15.01.2017 (26.10.1395)

نفيس ذکريا سرتاج عزيز ته د اوړو پوزه جوړوي

لیکنه : خوشحال آصفي

وروسته له هغې چې يو شمېر هيوادوالو څو ورځې وړاندې د پاکستان سفارت مخې ته د پاکستان پر ضد لاريون ترسره او په افغانستان کې یې د دغه سفارت د بنديدو غوښتنه وکړه؛ پاکستان يې په اړه غبرګون ښودلی دی. په کابل کې د پاکستان سفارت په یو بیان کې، د دغه هیواد د بهرنیو چارو وزارت د ویاند محمدنفیس ذکریا له قوله ويلي، چې د افغانستان په ناامنیو او بې‌ثباتۍ کې په دغه هیواد کې دننه میشتې تروریستي ډلې لاس لري. نفيس ذکريا په غير مستقيم ډول د هندوستان استخباراتي اداره (RAW) په افغانستان کې د ترهګرو په ملاتړ تورنه کړې ده او په يو ډول يې د خپل هيواد د سپيناوی هڅه کړې ده.

د پاکستان د بهرنیو چارو وزارت ویاند ویلي "افغانستان له ډیرو تروریستي ډلو سره لاس او ګریوان دی او په دغه هیواد کې بې ثباتۍ، د حقاني ډلې د مشرانو، افغان او پاکستاني طالبانو، داعش، القاعدې، جماعت الاحراراو نورو ډلو ته د فعالیت زمینه برابره کړې ده، له همدې امله دا سمه نه ده چې په افغانستان کې د خراب امنیتي حالاتو تور پر نورو واچول شي."
پاکستان په داسې حال کې په خپل هيواد کې د ترهګرو له روزلو او ورته د پناه ځايونو له ورکولو منکريږي چې تیر کال د دغه هیواد ملي امنیت سلاکار سرتاج عزیز د پاکستان په خاوره کې د یو شمیر طالب مشرانو او د هغوی د کورنیو موجودیت تائید کړی وو.

بل لور ته افغان حکومت د پاکستان د يادو څرګندونو په تړاو خپل غبرګون ښودلی دی. د افغانستان د بهرنیو چارو وزارت، د پاکستان هغه ادعاوې چې ویلي یې دي تروریستي ډلې او مشران یې په افغانستان کې دي، بې اساسه بللې دي. د افغانستان د بهرنیو چارو وزارت ویاند احمدشکیب مستغني ويلي «د افغانستان د دولت بهرنی سیاست داسې نه دی، چې له یو هیواد سره یې د اړیکو څرنګوالی پر بل هیواد اغیزې ولري او یا له یو هیواد سره د افغانستان اړیکې، له بل هیواد سره د افغانستان د اړیکو او همکاریو په ګرو کې وي.» نوموړي زياته کړې پاکستان تل ادعاوې کړي خو هيڅکله یې هم د خپلو ادعاو د ثابتولو لپاره اسناد وړاندې کړي نه دي.

سرتاج عزيز ته د اوړو پوزه

په هغه مهال کله چې د افغانستان، پاکستان، چين او امريکا تر منځ د افغان سولې څلور اړخيزې ناستې روانې وي نو پاکستان په کې د سياسي شوړې فرصت ليدلو. په هغه مهال سرتاج د دې لپاره چې له افغان سولې پروسې سره د مرستې په نوم به هم له افغانستان او هم د سيمې له هيوادونو امتياز ترلاسه کړي؛ په زغرده اعتراف وکړ چې دوی په ترهګرو نفوذ لري او په پاکستان کې اوسيږي. خو اوس چې ياده د څلور اړخيزو ناستو لړۍ ناکامه او د پاکستان له خولې سياسي مړۍ ووتله نو اوس يې د بهرنيو چارو وزارت د سرتاج عزيز د هغه مهال په خبرو د پردې اچولو او نوموړي ته د اوړو د پوزې جوړولو هڅه کوي.

دا سمه ده چې افغانستان له ډیرو تروریستي ډلو سره لاس او ګریوان دی او په دغه هیواد کې بې ثباتۍ، د حقاني ډلې د مشرانو، افغان او پاکستاني طالبانو، داعش، القاعدې، جماعت الاحراراو نورو ډلو ته د فعالیت زمینه برابره کړې ده، خو آيا کله پاکستان دا فکر هم کړی چې؛ دغو ترهګرو ډلو ته چې په افغانستان کې دننه بریدونه کوي؛ روزنځايونه او پناه ځايونه يې چيرته دي؟
آيا دوی له آسمانه رالويدلي دي او که د آی ايس آی د ترهګرو چرګو څخه راوتلي چرګوړي دي؟

اصلاً پاکستان اوس په افغانستان کې د روسيې، چين او ايران په مرسته د يوې نوې نيابتي جګړې لپاره بستر جوړولو په هڅه کې دی. په دغو ډول څرګندولو سره غواړي د نړيوالو پام بل لور ته واړوي او په خپله له دغه فرصته ګټه پورته او د افغانستان د بربادۍ لپاره بله لوبه جاري وساتي. د پاکستان په باور د هغوی د ګټو لپاره په افغانستان کې جنګ، جګړې او د ترهګرو شتون لازمي دی، ځکه له يوې خوا د افغانستان له جګړې په مستقيم ډول ګټه پورته کړي او له بلې خوا به د افغان سولې سره د مرستې او د مذاکراتو ميز ته د طالبانو د  حاضرولو په نوم له نړيوالو پيسې وشکوي. او له بل لوري به پاکستان ځان په سيمه کې له سياسي يواځيتوبه خلاص کړی وي. په دې معنا چې په افغانستان کې د جنګ د فکتور او عامل (وسله والو طالبانو او داعش) څخه په استفادې به له روس، چين او ايران سره خپلې اړيکې پراخې کړي.

ستاسي کمینټ به د پاڼی د مدیریت تر کتني وروسته خپور شي .

Your comment will be published after review by Directorate

Kommentar schreiben

Kommentare

  • داکتر سید خلیل الله هاشمیان (Montag, 16. Januar 2017 20:41)

    نویسندۀ توانا جناب خوشحال آصفی صاحب
    زکریا علیه السلام یکتن از پیغمبران الله تعالی (ج) میباشد که نام و سرگذشت او در سورۀ مریم آمده است - اکثرافغانها بشمول اولادۀ مرحوم فیض محمد خان (زکریا) تخلص خودرا (ذکریا) مینویسند، که نه تنها غلط است، بلکه عدول ازنص قران مجید میباشد. لطفا وسیله شوید که این غلط معروف اصلاح شود. با احترام - سیدخلیل الله هاشمیان

Bitte geben Sie den Code ein
* Pflichtfelder