سيد عبدالوهاب المان
Said Abdul Wahab - Germany

دنیا د جنګ میدان دی

په ژوندون کي قسم قسم خاطرې وي
څه خوږې ځيني بیا هم ډیري ترخې وي
-------
دا دنیا میدان د جنګ دی بیره مکړه
تورزن هغه چي یې توري ښې تیري وي
-------
ګاهي لوړ ګاهي پر کښته دا دستور دی
د انسان د ژوند رقم رقم قصې وي
-------
په نا خوالو د ژوندون وارخطا مه سه
عاجزي کي د انسان سُستي ريښي وي
-------
سه را پورته د ژوندون خوا ته که مخه
رڼا ورځي په خلوت کي توري شپي وي
-------
سرنوشت ځانته ټاکه اختیار یې خپل کړه
د طماع سړي سر ټیټه سترګي مړې وي
-------
بې ننګي به وي د هغو ور په برخه
چي غلام غوندي و بل ته سجدې وي
-------
ښه عزت او لوړ همت د ځان زېور کړه
بې همتو خلکو پښو کي زولنې وي

سید عبدالوهاب – المان
06.02.2013

څلوريځي

وطن به څه کړې چي واک د بل وي   --   هغه ورور څه کړې چي تاته غل وي
ښادي به څه وي د هغه خلکو   --   چي مشران یې د پردو مل وي
---------
چي د ژوند ونه کږه شي   --   طبیعت باندي حمله شي
نې طاقت نه یې قدرت وي   --    لږ طوفان سره چپه شي
----------
چي زوړ شي بیا رهي د مرګ په لور شي   --    ځواني او مستي نه وي په ناخوالو کي نسکور شي
د صفر په دايره کي د زمان اواز د مرګ شي   --   بندي بیا ابدي سي تورو خاورو کي د ګور شي
---------
خدایه ته سي زموږ د خلکو مددګار   --   د نفاق څخه یې زړونه کړي بیزار
ته حاکم یې ، ته رحیم یې ته قادر یې   --   زموږ د خاورو څخه ورک کړي ټول اغیار
---------
بې غیرته ځان خپل پټ کړي   --   د پردیو په لمن کي
خلکو منځ کي چي مخ تور وي   --   ځای یې نه وي په وطن کي
--------
چي مزه د نعمتو د ژوند سي نوره   --   هوسونه ،اُمیدونه سي نسکوره
د ځوانۍ یادونه پاته نور څه نه وي   --   د ژوندون پر سینما پرده سي توره

سید عبدالوهاب – المان
06.02.2013

ټو پک سالار وایي

زه توپک سالار یم   --   د پردو سره پر لاریم
د خپل ځان په ګټه باندي   --   د ورور مرګ ته هم تیار یم

وطن څه مانا یي څه   --   تجزيې ته په تلوار یم

ځان تغیر په هر حالت کړم   --   ابن الوقته په قطار یم

د غلام په شان سر ټیټئ   --   زه د نورو خدمتګار یم
ننګ ناموس مي ټول سودا کړه   --   زه دلال ددې بازار یم

ګا مسلم یا په بل دین یم   --   چالبازیو کي هوښیار یم

په زرو افغان مي مړه کړه   --   د جلاد غوندي خونخوار یم

بې حساب ډالر مي کوټ کړه   --   میلیونر سر مایه دار یم

سر مایه بې ظلمه نه سته   --   ددې فکر طرفدار یم

د افغان په بې ننګي کي   --   زه تر ټولو جوغه دار یم

د ټوپک زور راسره دئ   --   ټول تابع زه حکم دار یم

غله ډاکو مي دي ملګري   --   زه ددې ډلي سردار یم

که څوک چور کور یې تاراج کړم   --   په خپل کړنه کي مختار یم

زما په دور ډیري نجوني   --   سوې بستره ډیر مردار یم

سید عبدالوهاب – المان
04.02.2013

و پردو ته خدمت

نه پوهه نه مو علم ،په تخنیک هیڅ نه پوهیږو
درسته ورځ بیکار پراته يو و خیرات ته هوسیږو
--------
خپل وطن مو سره لمبه کړئ په میلیون میلیون مو مړه سول
د ملت په غم کي نه یو تر پردو ګټو جاریږو
---------
غلامي طوق را په غاړه ، هم په پښو مو ځنځیرونه
نه خپلواک او نه سالار یو خوشي هسي موږ ږغیږو
---------
موږ بلا پر ځان نازل کړه ، ټول هستي مو خپله وسوه (وسوځول)
پر ټټر پروت یو بیواکه نور سوځیږو او ژړیږو
----------
لاس مو اوږد دی و هر چا ته ، استقلال مو خپل لیلام کړ
نه اختیار د ښو او بدو، نه سړو کي حسابیږو
----------
را پیدا سوه په هر ګوټ کي سالاران چي وه په تيښته
اوس هیواد ټوټه ټوټه دی د نفاق په اور سوځيږو
----------
د ټوپک قانون را خپور دی ،انارشي راغله وطن ته
یو افغان که بل خفه کړي په خندا او خوشحالیږو
----------
په ظاهره مسلمان وي ، په باطن کي تور انسان
یو بیباکه پاک الله ته د شیطان سره رقصيږو
----------
راسه ګوره عاجزي ته ، سر نوشت مو بل را ټاکي
همت نه سته عزت نه سته سترګي کښته نه شرمیږو
---------
په ناحقه تور تورن دي ، پښتانه ټول خوارو زار دي
د خلاصون لاره مو نه سته په خپل کور کي رټل کيږو
----------
خدایه بیرته افغانان بیا لاس په لاس کور او کهول کړې
چي آزاد مو خپل وي هم یو بل سره جاریږو

سید عبدالوهاب – المان
03.02.2013
 

بیرته شا ته                 مخ ته 

Kommentare

Es sind noch keine Einträge vorhanden.
Bitte geben Sie den Code ein
* Pflichtfelder