23.04.2018 (03.02.1397)

د کندز د ماشومو شهیدانو په یاد کې
ملا عبدالسلام ضعیف
دغه بد رنګ انسانان وينم چې دنيا قتلوي
سبا دي وار دی خوشاليږه مه، چې ما قتلوي

په بيل نامه د بيل هدف لپاره هر څه وژني
کرار کرار اول احساس بيا دي تقوا قتلوي

بيا دي ضمير وژني د ټول معنوي فکر سره
بيا د نفاق په توره يو بل په سلا قتلوي

د هري ورځي پيښه بيل بيل امتحان وګڼه
تصادم نه دی، ستراتيجي ده، هره خوا قتلوي

ماشومان وژني، ښځي وژني، زوړ او ځوان مو وژني
څوک په تورتم څوک په تهمت څوک برملا قتلوي

ټوپک دبل مرمی دبل ماشه دبل په خوښه
دغرور څلي رنګ په رنګ جلا جلا قتلوي

امر د بل، مأمور مي خپل، قاتل مقتول مو دواړه
مرتزقه لکه ليوان اوس بې ګنا قتلوي

نن دي د تور، سبا د سور، بيا به د سپين په نامه
هغه دوستان چې تا بللي، بيا به تا قتلوي

سادګي نه ده نه ساده دکمان غشی درومي
هدف واضح دی، يا دي سر، يا دي پيشوا قتلوي

غلامي ومنه سر ټيټ کړه بيا خاموشه اوسه
کنه په نوم دي د طالب او د ملا قتلوي

ضعيفه نه ښايي دوستي له کافرانو سره
نن په ټوپک، بيا دي د زهرو په حلوا قتلوي

 

ستاسي کمینټ به د پاڼی د مدیریت تر کتني وروسته خپور شي .

Your comment will be published after review by Directorate

Kommentare

Es sind noch keine Einträge vorhanden.
Bitte geben Sie den Code ein
* Pflichtfelder