25.09.2017 (03.07.1396)
بې ناموسان د ناموس ساتونکو په ليکو کې
لیکنه : خوشحال آصفي

تېره ورځ د افغانستان د بیا رغونې لپاره د امریکا څارنې ځانګړې ادارې سيګار راپور خپور کړ چې د افغانستان د پوځي څانګې د وژل شویو منسوبینو له کونډو نه د هغوی د مېړونو د تقاعدي تادیو د ورکولو په بدل کې جنسي غوښتنې شوي دي.‌ د سيګار مشر جان سوپکو ويلي د ده د ادارې موندنو ښوولي چې د افغان ملي اردو اړوندو ادارو کې د شهیدانو له ښځو غوښتنې شوي چې تر هغه یي د خاوند د شهادت امتیازات نه ورکول کیږي تر څو د دوي جنسي خواهشات پوره نه کړي.

د افغانستان دفاع وزارت د سيګار راپور په کلکه رد کړی خو ولسمشرۍ ماڼۍ بيا ويلي په دولتي ادارو کې د افغان سربازانو د کونډو د جنسي آزار راپور صحت لري. د افغانستان ولسمشرۍ ماڼۍ مني چې په ځينو دولتي ادارو کې په وحشتناکه توګه ځينې ستونزې شتون لري خو د اصلاحاتو په راوړلو يې ټينګار کوي. د ولسمشرۍ ماڼۍ د وياند سرپرست شاه حسين مرتضوي ويلي، په ځينو ادارو کې په وحشتناکه توګه ستونزې شتون لري چې له تير حکومته پاتې دي، زمونږ مسوليت دا دی چې څنګه يې په مقابل کې مبارزه وکړو.

دا ډير د افسوس او شرم ځای دی چې د امنيتي ځواکونو په لیکو کې داسې وجدان پلورونکي او د ناموس قاتلان شتون ولري چې د خپل د سنګر ملګري ناموس او عزت ته يې سترګې پټې کړي وي. د مسلمان او افغان ملت لپاره دا ډير د افسوس خبره ده چې له يوې خوا د مسلمانۍ دعوه کوو، د جهاد نارې وهو او ځانونه د جنت ټيکه داران بولو، خو له بلې خوا بيا د امنیتي ځواکونو په مقدسو ليکو او سپيڅلي يونيفورم کې د ناموس داسې قاتلان شتون ولري چې حتی د خپل د سنګر ملګري عزت ته يې سترګې پټې  کړي وي.

نه يواځې د امنیتي ځواکونو په ليکو يا دولتي اداراتو کې دا ډول وحشتناکې ستونزې شتون لري بلکې په عامه توګه په ټول افغانستان کې په ځینو مواردو کې داسې ليدل شوي چې په ميرمنو، ماشومانو، هلکانو، او حتی په څارويو دې جنسي تيری شوی وي. له بده مرغه بايد ووايو چې ټوله ټولنه مو د جنسي فقر ښکار ده. درې کاله وړاندې په بدخشان ولايت کې له غوا سره د وسله والو طالبانو په نوم د دوه تنو د جنسي تيري خبرونه ورکړل شول. له هغې وړاندې له بزې سره د څو د جنسي تيري خبرونه او همداشان حتی له فيلمرغ سره د جنسي تيري خبرونه په تير کې ورکړل شوي دي. له خرو څخه د جنسي غريزې د سړولو خبرونه خو بيخي رسنيو ته نه راوځي. دا خو بيخي د ځينو په باور د مجردو ځوانانو لومړۍ ميرمن بلل کيږي.

دا هغه ترخه حقيقتونه دي چې زمونږ ټولنه ورسره لاس او ګريوان ده. خو پوښتنه اوس دا ده چې د دغو بدبختيو لامل څه شی دی چې زمونږ ټولنه يې په غم اخته کړې ده؟

د دغو ټولو بدبختيو سرچينه له جنسي فقر څخه اخيستل کيږي چې زمونږ په ټولنه کې اوج ته رسيدلی دی. ځوانان او پېغلې مو د لوړ ولور له امله پاخه عمر ته ورسيږي خو د واده خاوندان نه شي. تر ټولو بده يې لا ده هغوی چې پيسې لري که هر څومره زوړ او د قبر پر څنډه ولاړ هم وي؛ ورته تنکۍ شپاړس کلنه پېغله په نکاح ورکول کیږي خو هغوی چې پيسې ونه لري که اتلس کلن ځوان هم وي؛ څوک ورته لور يا خور نه ورکوي. همدا ستونزې د دې باعث شوی دی چې ځوانان مو د غير اسلامي او غير اخلاقي لارو خپله جنسي غريزه پوره کړي.

دلته داسې نه ده چې ګويا د امنيتي ځواکونو ناموس ساتونکو په لیکو کې دې بې ناموسان هم له همدې ستونزې کړيږي؛ بلکې هغوی چې د امنيتي ځواکونو د شهيدو سربازانو له کونډو جنسي غوښتنې کوي؛ د خدای قهر وهلي ډيری يې خپلې ميرمنې هم لري خو چې وجدان يې چټل، نجس او پلورل شوی دی نو د خپل د سنګر ملګري ناموس ته هم زړه ښه کوي او د خپلو خواهشاتو قرباني کوي يې. دغه اشخاص ډيری يې نه جنسي فقر لري او نه هم بې واده پاتې شوي بلکې د دوی وجدانونه مړه شوي دي او ترېنه د انسان په جامه کې عظيم شياطين جوړ شوي دي. د دغو خلکو سره بايد داسې عمل وشي چې علني محاکمه او بيا د خلکو له خوا د اسلام د قوانينو مطابق په تينګو سنګسار شي.

که څه هم داسې ويل کيږي چې ګويا د امنيتي ځواکونو د شهيدانو له کونډو د تقاعد په بدل کې د جنسې غريزې غوښتنه يوه تبليغي بڼه ولري او کوم حقيقت نه وي، خو بيا هم حکومت ته په کار ده چې په دې برخه کې خپل مسوليت په جدي توګه سر ته ورسوي او پلټنه يې وکړي. که چيري رښتيا وي خو عاملان يې د علني محکمې له لارې د خپل جرم په سزا ورسول شي څو نورو ته عبرت او د امنيتي ځواکونو د شهيدو سربازانو د وينې حق ادا شي. او که چيري ياد راپور تشه تبليغاتي بڼه ولري بايد له جان سوپکو يې په اړه وضاحت وغوښتل شي.

ستاسي کمینټ به د پاڼی د مدیریت تر کتني وروسته خپور شي .

Your comment will be published after review by Directorate

Kommentar schreiben

Kommentare

  • اقبال (Dienstag, 26. September 2017 01:53)

    عنوان دی سم مګر په ناسمه ځای کی دی کارولی .تاسی باید لیکلی وی چه [ چه د خرو غوښی لویانو ته حلالی دی ]
    یعنی
    هغه عسکر چه د اسلام دښمنه او افغان دښمنه نړیوالو سړیخورو له خوا روزل شوی، تمویل او تجهیزیږی د څه د پاره ، د ملی او اسلامت د ځپلو د پاره چه د هماغو سړیخورو او د هغوی له همدغه غلامانو ( چه اوس یی له مرګ وروسته میرمنو ته د جنسی اړیکو هڅی لری ) څخه د دوی ناموس ، د دوی خاوره ، او د دوی خلک او خپلواکی ساتی . همدغه عسکرو هماغه ننګیالی وژلی او د هغو له خوا وژل شوی جه اوس یی هماغه غلام چارواکی له میرمنو هم ګټه پورته کوی ، دغه چه تاسی ورته ناموس ګټونکی وایاست له ع او غ نیولی تر همدغه غلام چارواکی چه د هغه غریب او ناپوهه وژل شوی عسکر له میرمنو هم ناوړه ګټه پورته کوی بی ناموسان ځکه دی چه د هغو عسکرو په ناموس صرفه نه کوی نو تر دی نور بی ناموسان نشته او دغه د همدغه ع او غ له خوا مقام ورکول شوی او معاش ورکول کیږی او ع او غ ایجړا ګان د هماعه جان کیری له خوا د امریکا سفارت کی وټاکل شو او دی ته اوس هم خبلواکی وایاست ، د انګریزانو په شتون له انګریزانو د خبلواکی لمانځنه کوی ، داسی مثال لری لکه د سړی په ناموس چه لونډ پروت وی او د هغه لوڼد په شتون کی هغه میرمنه خپله میرمن او هغه لونډ خپل ساتونکی او خدای ګڼی مننه

Bitte geben Sie den Code ein
* Pflichtfelder