22.09.2018 (31.06.1397)
ایران کې پر پوځي پرېډ خونړی برید شوی

وسله والو د ایران په اهواز ښار کې د پوځي پرېډ په دستورو بريد کړی چې د انقلابي ځواک په ګډون ۲۴ کسان پکې وژل شوي او ۵۰ نور ټپيان دي.

د ایران دولتي رسنۍ وايي بريدګرو د دريځ له شا څخه په پرېډ بريد کړی. دولتي رسنۍ وايي فکر کوي چې دا به د 'اسلامي دولت" ډلې اړوند سني وسله وال وي.

ایرنا خبري اژانس د وژل شویو شمېر ۲۴ ښودلی. دغې رسنۍ د یوې "باخبره سرچینې" له خولې ویلي، ښايي د وژل شویو شمېر نور هم ډېر شي.

د انقلابي ځواک يوه وياند ویلي، فکر کېږي بريد د سني عربو بېلتون‌پالو وسله والو کار وي.

د ګڼو وسله والو د وژل کېدو خبر ورکړل شوی. دغه دستورې د ایران - عراق جګړې د ۳۸مې کليزې په مناسبت جوړې شوې وې.

د برید مسؤلیت د 'الاحواز ملي مقاومت' ډلې منلی

د الاحواز عربي ازادي غوښتونکي جنیش (چې ځان په خوزستان کې د مېشتو عربانو د حقونو مدافعین بولي) ویاند یعقوب ویلي: "د الاحواز ملي مقاومت چې عام او شامل بنسټ دی، د برید مسؤلیت مني. دا عملیات زموږ د مشروع مقاومت یوه برخه ده او موږ به هېڅ عادي ولسي وګړی په نښه نه کړو."

د وسله والو ځواکونو یوه مرستیال ویلي، درې بریدګر وژل شوي او یو نیول شوی دی.

د ایران رسمي خبري اژانس اېرنا وايي، له دې بریده لږ تر لږه شل کسان روغتون ته لېږدول شوي دي. د اژانس په خبره په دغه برید کې هېڅ حاضر چارواکی نه دی ژوبلېدلی.

د ایران د بهرنیو چارو وزیر جواد ظریف ویلي، "بهرني رژیم" د اهواز بریدګر روزلي او وسلې یې ورکړې دي.

د ایران خوزستان ولایت او بیا په ځانګړې توکه د اهواز ښار کې په ورستیو کلونو کې د نارامۍ او وسله والو بریدونو رپوټونه ورکول کیږي.

همدارنګه لیدل کېږي چې د ډزو پرمهال ماموران او حاضر خلک د ځان ساتنې په پار پر ځمکه پړمخې پریوتلي.

تسنیم خبري اژانس ویلي، بریدګرو پوځي جامې لرلې او څو کسان وو، له ډزو وروسته یې ځینې له سیمې تښتېدلي خو امنیتي کسان یې پل څاري.

د فارس خبري اژانس په وینا، دوه بریدګر وژل شوي او یو نیول شوی دی.

د خوزستان یوه چارواکي غلام رضا شریعتي د دوو بریدګرو د وژل کېدو خبره تایید کړې او وايي دوه نور کسان نیول شوي چې یو پکې ټپي شوی بریدګر دی.

د سپاه یوه ویاند رمضان شریف ایسنا خبري اژانس ته ویلي: "هغه کسان چې پر پوځي پرېډ یې ډزې کړې او عام خلک او پوځيان یې ټپیان کړي، له الهوازیه بهیر سره تړاو لري."

اهواز د ایران له هغو ښارونو دی، چې تېر کال پکې د ورځني ژوند د اړتیا توکو د نشتوالي له کبله په کې د حکومت ضد پراخې مظاهرې وشوې.
راپور: بي بي سي

ستاسي کمینټ به د پاڼی د مدیریت تر کتني وروسته خپور شي .

Your comment will be published after review by Directorate

Kommentare

Es sind noch keine Einträge vorhanden.
Bitte geben Sie den Code ein
* Pflichtfelder
Bitte beachten Sie, dass die Inhalte dieses Formulars unverschlüsselt sind